Hiede
Li hiede esteut l' trope des biesses dåzès ptitès djins d' on viyaedje, d' ene comene, k' ene sakî, li hierdî, rashonnéve l' å-matén po les moenner paxhe so les cmonès teres ("les comognes") et les ramoenner al nute. Li hierdî prévneut k' il aléve end aler ou rivni tot coirnant. I passéve pal hierdå ou hierdåve voye ou hierdåvoye po-z aler dins les trixhes, les cmognes, les sårts, les fagnes eyet les virêyes ki n' estént nén cultivêyes a ç' moumint la. Li plaece ki les biesses alént cwand il fjheut foirt tchôd s' loméve sovint "li prandjleu" (di "prandjire").
Li hierdaedje dureut do 1î d' may al sint Rmey (1î d' octôbe).
Si gn aveut k' des vatches dins l' hiede, li hierdî esteut on vatchî; s' i gn aveut fok des bedots, on bierdjî; s' i gn aveut k' des gades, on gadlî; s' i gn aveut k' des pourceas, on poirtchî; ou minme on tchvålî po les tchvås.
Il pleut gn awè sacwantès hiedes dins on seul viyaedje, avou tchaeke leu hierdî.
Li hierdî s' afûléve sovint dins ene pea d' gade et i poirteut ene bezace avou si amônucion po fé doze eures, ki c' est les mwaisses-tinants des biesses ki l' dinint. Il aveut on tchén, ou sacwantes, po l' aspaler.
Çoula s' a fwait djusk' å cminçmint des anêyes 1900 et des.
Hårdêyes difoûtrinnes
candjî- Di pus d' racsegnes e francès: Le troupeau communal — Le pâtre commun en Wallonie
- Di pus d' racsegnes e francès: Histoire d'autrefois - La Herde