Guere ås petrodolårs

L' atuze di guere ås petrodolårs est rashiowe so l' idêye ki tote li politike difoûtrinne des Estats Unis dispu les anêyes 1970, al boune, est acviernêye pal såme di wårder li dolår amerikin come mwaisse manoye pol comiece eternåcionå. Et copurade sol martchî del petrole, la kel dolår si lome petrodolår.

Cåze del guere ås petrodolårs

So li cmince des anêyes 1970, les Estats Unis imprimént et dispinsént bråmint dpus d’ dolår ki l’ ôr k' il avént po les waeranti.

Kékès anêyes pus tård, li France aveut dmandé li rpayaedje avou d’ l' ôr do moncea d' dolårs k' elle aveut so les bresses. Les U.S. ont rfuzé, ca i n’ avént pus assez d’ ôr po covri leu manoye. C’ est po ça ki les U.S. ont fwait martchî avou les payis d' l' OPEP ki s’ egadjént a vinde leu produccion d' petrole e dolårs U.S.. A pårti d’ adon, tos les payis k’ atchtént do petrole divént aveur des dolars US. Udonbén nd atchter contes des béns ou des siervices. Adon, les U.S. n’ avént k’ a imprimer. Les U.S. mintnént insi årtificielmint li valeur comerciåle de leus dolårs et s' fournixhént cåzu gratwitmint e petrole pal djeu del plantche ås biyets.

Vraiyès gueres cåzêyes pås petrodolårs

Ki l' guere d' Irak soeye ene guere ås petrodolårs est mostré pa les deus etrevéns shuvants :

• E 2000, l' Irak todi moenné pa Saddam Hossein a cmincî a vinde si petrole e-n uros.
• E 2003, cwand les Estats Unis ont-st abroké so l' Irak, et schafyî l' Saddam, les noveas moenneus ont ricmincî do vinde leu petrole e dolårs.

Ôtès sayes di s' afranki des petrodolårs

E Venezuwela, li prezidint Hugo Tchavez a ossu cmincî a vinde si petrole conte des ôtes manoyes.

E 2008, l' Iran a drovou si prôpe boûsse å petrole la k' ele vind si petrole e-n uros, dolårs amerikins et Yen djaponès.

Bråmint voeynut ki les margayes des Estats Unis avou l' Iran ni sont adierceyes ki po l' espaitchî di fé payî s' petrole avou des ôtès manoyes ki les US$.