Diccionaire di Tot l' Walon (R10)

Pol discramiaedje des årtikes avou l' mot « Diccionaire djenerå do walon », loukîz cial.

Li Diccionaire di Tot l' Walon ou DTW (prononcî détéwé), c' est on pordjet k' a stî enondé pa Johan Viroux diviè 1992 (so l' alomåcion DJW, Dicsionêre jènèrâl do walon). Mins gn a måy yeu ki Lorint Hendschel eyet Tiri Dumont k' ont tapé, podbon, ene cåkêye d' intrêyes, eyet les cossemer emey les waloneus.

Dins l' djivêye des motîs do walon, il est rprins so les limeros [R1] (fitchî 1993 avou l' prumire ortografeye del kimince do rfondou), [R2] (fitchî des N, minme sistinme) et [R10] (modêye e rfondou definitif, so les fis).

Såme

Li pordjet c' est di ramexhner tos les mots walons di tos les motîs walons k' egzistèt, eyet d' endè fé ene båze di dnêyes infôrmatike ki permete des sûtis rcweraedjes et des studiaedjes so les mots.

Istwere do pordjet

Loukîz a : Diccionaire di Tot l' Walon (R1 + R2)

Tiri Dumont aveut ddja fwait ene saye so aspougneu d' tecse so les N e 1993. Adonpwis, il a fwait les B, ene pårtêye des C et les D. Lorint Hendschel a fwait les A et ene pårteye des C.

Lucyin Mahin a bouté so les Z e 1997.

Li fond di dnêyes a stî metou so les fis, avou ene eterface waibe po fé des cweraedjes, pa Lorint Hendschel e 2001. Poy baguer sol sierveu da Pablo Sarachaga e 2003.

I gn a pus d' 37.504 intrêyes ki covrèt les letes A, B, C, D, E et sacwantès intrêyes plik plok dins les ôtès letes. Avou les N (nén sol fond di dnêyes mins so ene pådje zels tot seus, ça fwait cåzu 40.000 foyous. Mins gn a bråmint ki dvèt esse rimetous eshonne, ca dins l' prumî fond d' bayeyes, tchaeke sinse aveut on foyou po lu tot seu.

Li cweraedje si pout fé so l' mot walon e rfondou (mins tot n' a nén co stî rcoridjî), oudonbén so les scrijhaedjes Feller (d' après les scrijhaedjes dins les motîs rwaitîs), ou co dins l' definixha (çoula permete a pô près di sayî des rcweraedjes so des mots francès po trover les mots walons).

Li cweraedje pout eployî des erîlêyès ratourneures SQL po fé des spepieus rcweraedjes.

Asteure, Lucyin Mahin fwait co on cint d' mots tos les moes (totavå l' ôre alfabetike), eyet les tiper so on ridant d' l' Aberteke. I les rmete eto dins l' grand fitchî sourdant, sol cogne d' on tåvleu, aberwetåve.

E 2006, Pablo Sarachaga a rmetou totes les dnêyes eshonne, les Z et les N, avou. Il a prezinté les rfondowès cognes des mots ki li rfondaedje aveut ddja stî bén studyî. Il a radjouté des hårdêyes eviè l' esplicant motî, po les mots k' estént ddja eplaidîs laddé.

Li 21 d' djulete 2020, gn aveut dipus d' 31.300 intrêyes. Li 18 di djun 2023, end av 34.273. Li nombe d' intrêyes pout esse shuvou tos les troes moes sol gazete Li Rantoele.

Eployaedje pa des ôtes motîs

Li DTW est on mwaisse sourdant pol construjhaedje di l' esplicant motî eyet po l' ovraedje tecnike del Tåvlotêye Rifondaedje del Rantoele.

Alére

Pablo Sarachaga : Li Diccionaire di Tot l' walon, Li Rantoele 77 (bontins 2016).

Hårdêyes difoûtrinnes

• Li DTW so les fis, po cweri après des mots k' î sont ddja.
• Prezintaedje e francès so l' Aberteke
• Prumire modêye
• Dierins rapontiaedjes et esplikêyes (djanvî 2016)
• Mwaisse sourdant del lete N (dedja ricopyî pår)