Contene

Ene contene, c' est on rime-rame d' efant po-z aprinde les chifes et les nombes.

gn aveut on côp onk

Li cene d' après ni va ki disk' a 8, dandjreus paski l' påpåd tént les deus pôces del grande djin, ki lyi mostere les doets onk a onk

Gn aveut-st on côp onk :
Il estént zels deus
ki s' batént zels troes
come cwate tchéns.
C' esteut cénk droles, va,
ces shijh la.
Si l' setinme n' arivéve nén,
li ûtinme li stronnéve.

onk et deus dj' a veyou l' leu

C' est ene contene foirt kinoxhowe. Gn a sacwants modêyes, di diferinnès coines del Walonreye. Ele ni vont ki disca 20. Mins des scrijheus k' i gn a end ont scrît des rawetes disca 40 u 50.

Modêye del Hôte Årdene (1 a 20)

Onk et deus, Djhan l’ peneus
Troes et cwate, pelêye makete
Cénk et shijh, i mousse si tchmijhe
Set et ût, i djowe del flûte
Nouv et dijh, il est e l' five
Onze et doze, i rote a crosse
Traze et catoize, i fåt k’ i passe
Cwénze et saze, fåt k’ i rapasse
Di-set et dijh-ût, il a l’ tiesse cûte
Dijh-nouv et vint, i fåt k’ i s’ pinde.

…Et vo l' la pindou
Pal pea do cou.

Modêye do payis d' Batogne (1 a 40)

Onk et deus, dj' a veyou l' leu;
Troes et cwate, dj' a veyou s' pate;
Cénk et shijh, i meteut si tchmijhe;
Set et ût, i djowéve del flûte;
Nouv et dijh, i gn aveut del bijhe.
Onze et doze, il aveut l' tosse;
Traze et catoize, il aveut l’ rôze;
Cwénze et saze, i meteut ses tchåsses;
Di-set et dijh-ût, i magnive ene trûte
Dijh-nouv et vint, il aveut må l' vinte.

Shûte : Tecse vaici (so l' Aberteke)

Modêye Wikipedia (1 a 50)

Onk et deus, dj' a veyou l' leu;
Troes et cwate, dj' a veyou s' pate;
Cénk et shijh, i meteut si tchmijhe;
Set et ût, i djouwéve del flûte;
Nouv et dijh, i gn aveut del bijhe.

Onze et doze, il aveut l' kéntosse;
Traze et catoize, i moussive e poice;
Cwénze et saze, c' est la k' i passe;
Di-set et dijh-ût, i criyive gnayûte;
Dijh-nouv et vint, il aveut må s' vinte.

21 & 22, i n' aveut nén peu
23 & 24, i rlavéve si djate
25 & 26, i rivneut del shijhe
27 & 28, si boûsse esteut vude
29 & 30, i beveut ene pinte

31 & 32, ratokéve si feu
33 & 34, la k' i modeut s' gade
35 & 36, rivneut del falijhe
37 & 38, i magnive ene trûte
39 & 40, il aléve vey si matante

41 & 42, i fjheut l' grandiveus
43 & 44, i tchessive si cate
45 & 46, i rifjheut ene prijhe
47 & 48, si tchå esteut cûte
49 & 50, si mame est vayante

Hårdêye difoûtrinne

Ôte modêye di "onk et deus, dj' a veyou l' leu" (so l' Aberteke)