Complinte d' ene pôve botresse (arimé)

Li Complinte d' ene pôve botresse, c' est ene powezeye e walon sicrîte pa Gilles Ramoux e 1804. Il est don scrît dins ene ortografeye di dvant Feller.

L' arimé a stî rmetou e sistinme Feller dins l' grosse antolodjeye Piron.

Modêye e Feller

Qui n' so-dje èco come dj' èsteû
Divant d' èsse marièye !
Dji louk'reû d' mî miner m' djeû
Po n' pus èsse trompèye;
Mi bouname èst-st-on pôv' sîre
Et dj' a stu dj' èl pou bin dîre
Ine pôve aveûglèye ! (deus feyes)

I gn' årè bin vite qwatre ans
qu' dji soufe, qui dj' èdeûre!
C' fourit po l' nut' dè l' sint Dj'han,
Bènèye l' avinteûre !
Qwand dji hoûta sès sièrmints,
Ô qui n' touma-dje so l' moumint
A fî fond d' on beûr ! (deus feyes)

C' èst-st-on drole cwér måheûlé
Qui n' a nole goviène;
Si vite qu' il èst foû dè lét,
Vo-l-là à l' taviène ;
So l' timps qu' avou mès-èfants
Sins boûre, sins froumadje, sins pan,
A plorer dji d'fène ! (deus feyes)

Qwand i r'vint d' å cåbarèt,
l' èst sô come ine bièsse !
Il èst todi plin d' pèkèt
Djusqu' à d'zeû dè l' tièsse
Et s' sprint-i s' cowe di ramon
Po m' fé danser l' rigodon;
Vola sès carèsses ! (deus feyes)

Mi mame mi l' aveût bin dit
Qui dj' sèreû trompèye !
Dji m' crèyéve è paradis
Di m' veûy ahèssèye !
Mågré mès ponnes, mès toûrmints;
Binamèye ! Poqwè n' a-dje nin
Hoûté vos consey ? (deus feyes)

Modêye e rfondou

Ki n' so dj' eco come dj' esteu
Divant d' esse marieye !
Dji loucreu d' mî moenner m' djeu
Po n' pus esse trompêye;
Mi bouname est on pôve sire
Et dj' a stou dj' el pou bén dire
Ene pôve aveulêye ! (deus feyes)

I gn årè bén vite cwatre ans
K' dji sofe (sofrixh), ki dj' edeure !
Ç' fourit po l' nute del Sint-Djhan,
Beneye l' avinteure !
Cwand dji schoûta ses siermints,
O ! Ki n' touma dj' so l' moumint
A fén fond d' on beur ! (deus feyes)

C' est on drole coir måxhalé
Ki n' a nole goviene;
Si vite k' il est foû do lét,
Vo l' la al taviene ;
So l' tins k' avou mes efants
Sins boure, sins froumadje, sins pan,
A plorer dji dfene ! (deus feyes)

Cwand i rvént d' å cåbaret,
'L est sô come ene biesse !
Il est todi plin d' peket
Disk' ådzeu del tiesse
Et s' prind-t i s' cawe di ramon
Po m' fé dansî l' rigodon;
Vola ses caresses ! (deus feyes)

Mi mame mi l' aveut bén dit
Ki dj' sereu trompêye !
Dji m' creyeu e paradis
Di m' vey ahesseye !
Mågré mes poennes, mes tourmints;
Binamêye ! Pocwè n' a dj' nén
Schoûté vos consey ? (deus feyes)