Come des gaeyes so on baston ey ôtes powinmes (powinmes)

Come dès gayes su on baston et autres poèmes

Come des gaeyes so on baston ey ôtes powinmes (Come dès gayes su on baston et autres poèmes), c' est ene pitite ramexhnêye d' arimés e walon sicrîte pa Émile Gilliard. Elle a vudî e 1995, dins on limero speciå des Cayés walons (58inme anêye, lº 11, nôvimbe 1995).

Tite

Émile Gilliard esplike dins l' divant-z-ouve ki l' tite vint d' ene ratourneure : « arindjî tot come des gaeyes so on baston », çu ki vout dire adjinçner ene afwaire sins pinser ås rujhes, rever k' tot irè bén. Adon, por lyi, li tite « Come des gaeyes so on baston » pôreut esse ratourné pal mot francès utopie (utopeye).

Contnou do live

I gn a ki cwate powinmes dins l' live (c' est tot des powinmes e libes vers) :

• Come dès gayes su on baston : on long powinme di shijh pådjes, ki cåze di politike et disfind les ptitès djins (lès sins-caurs, lès sins-têres, lès sins-ovradjes èt lès sins-nom). Il a stî scrît li 27 di djulete 1979 a Vinon, ene veye di France, dins l' Var. Dins ç' powinme la, Gilliard, i dit k' l' ome n' est nén libe, et ça l' rind måvlé.

sicole gayole

fabrique gayole

casêrne gayole

lodj'mint gayole

état gayole

Sins vraiymint l' dire, i fwait comprinde k' i sohaite li revolucion.

Faurè bén qui l' vint toûne.

Faurè bén qui l' djoû vègne,

on sèm'di, on dîmègne,

on djoû…

Dins sacwants passaedjes, on trouve minme ene filozofeye anårtchisse :

Gn'ârè pupont d' passe-drwèt,

pupont d' poûssant.

Èt nos bouterans tortos èchone :

I gn'ârè pont d' pwarteû d' drapia

èt pont d' drapia,

pont d' maisse nèrén

• Rapsodiadjes po dès vîs mots pièrdus : on powinme di cwate pådjes k' aveut ddja stî eplaidî dins Silicose Valey-Tchôkmwâr, e 1989. Pol dire radmint, c' est on boket miråcolieus, ki rgrete k' on n' cåze pus waire walon.
• I bètche après : on powinme di deus pådjes, avou on rfrin. C' est on boket ki cåze do tins ki passe et ki conte li viye d' ene sakî, avou totes les grandès estapes. Il a stî scrît li 30 di nôvimbe 1988.
• Sacants spites : ene priyire crustinne d' ene pådje, ki l' oteur a scrît li 23 d' avri 1989.

I gn a eto on motî d' ene pitite pådje al difén do live.