Calindrî suwedwès

Li calindrî suwedwès fourit-st eployî el Suwede (ey el Finlande, k' adon fjheut pårteye do rweyåme di Suwede) do 1î d' måss 1700 disk' å 30 di fevrî 1712, ey esteut ewal å calindrî djulyin mins avou on djoû di decalaedje.

E novimbe 1699 i fourit decidé kel Suwede aléve adopter li novea calindrî grigoryin (k' esteut ddja eployî påzès estats pretestants almands) a pårti di 1700. Mins purade ki d' passer les 10 djoûs di decalaedje avou l' calindrî grigoryin, l' idêye esteut del fé graduwelmint, on djoû par an so les 11 anêyes bizetes (sorlon li calindrî djulyin) inte 1700 eyet 1740, tot n' contant nén les djoûs d' rawete di ces anêyes la.

Li plan fourit shuvou po 1700, bizete d' après l' calindrî djulyin, et on passa adon do 28 di fevrî 1700 å 1î d' måss; do côp, li Suwede esteut decalêye ossu bén des payis eployant l' calindrî grigoryin (di 10 djoûs trop court) ki des payis eployant li calindrî djulyin (di 1 djoû di trop).

Mins on n' shuva nén l' plan po 1704 eyet 1708; çou ki fwait ki nén seulmint li Suwede eployive on calindrî diferint do resse do monde, mins ki l' plan po passer å novea calindrî aveut tourné a cou d' poyon. Do côp, e djanvî 1711, li rwè Tchåle XII decida d' abandner ci calindrî speciål la, et d' rivni å vî calindrî djulyin. Po çoula, on radjouta-st on djoû di pus a l' anêye 1712 ki fourit-st insi deus côps bizete, avou on 29 eyet on bizåre 30 di fevrî.

Finålmint, li Suwede passa-st å calindrî grigoryin e 1753, tot passant 11 djoûs, li 17 di fevrî åyant come londmwin li 1î d' måss. Mins nerén, les rîles grigoryinnes pol cårculaedje del date di Påke ni seront acceptêyes pal Suwede k' e 1844.

Moyinådje - 28 di fevrî 1700	calindrî djulyin
1î d' måss 1700 - 30 di fevrî 1712	calindrî suwedwès
1î d' måss 1712 - 17 di fevrî 1753	calindrî djulyin
1î d' måss 1753 -	calindrî grigoryin