Bernard Mondjean

Bernard Mondjean, c' est on scrijheu e walon d' après Virwinvå et Couvén.

Ses bokets ont parexhou dins «Fagne et Thierache».

Egzimpe di scrijhaedje

Les tournêyes do novelan

Adon, vo nos î la, a l’ fameuse tournêye do novelan.

Èç djoû la, i s’ faleut lever dåre-dåre.

«Boune anêye, boune santé, popa et moman !».

Kékes galetes po ddjuner, ene djate di cafè : nos estans d’ atake.

C’ esteut å ci k’ aveut fini l’ prumî po nd aler rabressî nos grand-popa et grand-moman : « boune anêye, boune santé » ey ene prumire dringele.

Nos parints arivént. Ene, deus ptitès gotes, on n’ demare nén so ene djambe…

Vo nos la pårtis po l’ djournêye. Prumire plaece, tcheu mononke Victor. I vikéve tot seu dins ene pitite måjhone. On nd aveut peu. Tos ls ans, el minme racontaedje, el minme ranguinne. Del nute, il aveut etindou des leus. I steut presse a les zigouyî. Padrî l’ ouxh, il aveut si hatche. On l’ veyeut e tournant s’ tiesse. On esteut blancs come des naveas. E berdelant, les grands bevéns ene et deus gotes.

Vo nos la ndalés po l’ Pweyowe. La, c’ esteut ene cinse ; nén ene cinse come asteure, ene cinse avou l’ fumî dvant l’ ouxh, des poyes, des åwes, des tchets, des tchéns et del berdouye pattavå tot. I n aveut l’ vî Adofe, pweyou d’ 14-18, des blankès moustatches avou deus tchandeles e pindreye. A contrucour, nos djhans e l’ rabressant : « boune anêye et boune santé ». Ouf ! rén so nos tchmijhe ! Drola, m’ popa beveut del blanke, ene et deus gotes francesses.

Did la, nos dischindans a Gonrî tcheu l’ mårene di m’ popa. Dj’ esteu fir d’ î aler ; come dj’ esteu l’ pus vî, dj’ aveu droet a ene pîce di vint francs ; les ôtes n’ avént k’ dijh francs. Droci, i bevéns do Dubounet. Deus bén seur !

Après, nos alans tcheu l’ mononke di m’ popa : des galetes, des salêyès biscûtes, i nd aveut plin l’ tåve. Onk u deus guignolets kirch, des côps troes pu e rote tcheu mononke Françwès et deus cognaks.

Midi ! Fåt esse a l’ eure a Ptegniye tcheu m’ grand-moman. On esteut todi tårdous. Èm pårén esteut ddja la. El tåve esteut metowe, on pleut mindjî avou troes, cwate veres di vén.

Pu, vo nos la pårtis tcheu ene matante di m’ moman, tante Zeliye. Ele dimoréve a Doube, a l’ taenreye. Drola, i fijheut stroet, on esteut a l’ coujhene avou des galetes et on ptit vere di violete. C’ esteut bon ! Come todi, deux gotes et vo nos la pårtis po l’ nouvinme plaece a Ptegniye, tcheu l’ gros Fred et tante Aline. Et co todi ene, deus gotes. C’ est drola k’ on rveyeut nos cuzéns d’ Cerfontinne. Il estént ene dijhinne. On esteut ene vintinne dins l’ måjhone. Ké dalaedje !

Tcheu l’ pitit Michel et s’ comere Pålene, des vijhéns di m’ grand-moman, co deus gotes po popa.

Après, todi a Ptegniye, nos aléns tcheu mononke Djule dou k’ on rtrovéve les Cerfontinnwès. Ké djeu ! El måjhone esteut cou dzeu cou dzo. Co ene, deus gotes pu ritoû tcheu grand-moman avou les cuzéns et hop ! deus gotes po m’ popa.

Èç côp-ci, vo nos la tcheu mononke René a Couvén. Droci, on n’ bodjive nén. Nén on mot. On nos åreut dinè l’ bondiu sins cofession, sortot k’ i rwaiténs el djournå televizé. Luk Beyer n’ arestéve nén d’ cåzer tot seu dins l’ televuzion. Co deus ptitès gotes po m’ popa. Tchaeke côp, l’ mononke dijheut a nos parints : « K’ i sont saedjes, on n’ les etind nén, c’ est nén come les ôtes ». Nozôtes, on sinteut ene oriole ådzeu d’ nos tiesses.

I nos fåt co aler tcheu l’ pårén di m’ moman, a Couvén ; el pitit Fernand et s’ comere Camile, ki n’ esteut nén pus grande ki lu. I n aveut on bea sapén d’ Noyé, on vraiy avou des boles tocosté, des loumrotes, des poys d’ andje. Co deus gotes po m’ popa. Il esténs djintis et prevnants. I nos veyént voltî.

Si m’ pårén esteut e s’ måjhone, on passéve et hop ! deus bires trappises. Èm popa esteut a mitan berzinke.

I n aveut co ene dierinne hobete, tcheu Djinete et Pire, ene cuzene a m’ moman : co deus gotes. Les tchveas estént e bataye.

Faleut bén rintrer. El vweteure conoxheut l’ voye. E m’ måjhone, el faleut rintrer dins l’ gåraedje. Dji n’ sai nén comint m’ popa fjheut po-z adjuster s’ côp. A poenne dijh cintimetes di tchaeke costé. Ses iys n’ estént pus a l’ edroet des trôs. I n’ a djamåy raté s’ côp po rmoussî l’ vweteure.

Vla ene djournêye do nouvelan come i gn a pupont.

Boune anêye, boune santé, ene galete ey ene gote !

Hårdêye difoûtrinne

Minme tecse ki droci padzeu (mwaisse ortografeye)