Bernard Baille

Bernard Baille, c' est on politikî walon k' est mimbe d' Ecolo. Il a skepyî li 26 di djanvî 1952, a El Lovire.

Biografeye

Bernard Baille a divnou on mimbe del Djonnesse Ovrire Crustinne k' il esteut co on djonnea. Adonpwis, il a bouté po ç' soce la cwand il a rfuzé d' fé s' siervice militaire et k' il a stî oblidjî d' fé on siervice civil el plaece.

Il a stî conseyî al veye di Twin (di 1989 a 1994 pwis d' 2000 a 2002) et eto deputé al Redjon walone (di 1995 a 1999) et deputé federå (di 2002 a 2003). Do tins k' il esteut deputé walon, il esteut ossu otomaticmint mimbe do Pårlumint del Federåcion Walonreye-Brussele.

Ouve pol walon come deputé

Å Pårlumint del Federåcion Walonreye-Brussele, il a fwait deus kessions å Govienmint sol manire di mia mete li walon e valeur. Dins ene kesse do 21 di may 1996, il a cåzé d' linwe-ehåyaedje do walon et do raploû d' Mårcinele do moes d' måss 1995 sol rifondou walon.

Les deus côps, Bernard Baille a fini s' kesse avou on ptit mot e walon : Merci brammin des coups de vos n'attentions! (kesse do 21 di may 1996) et En vos r'mersiant de m'avoir ascouté (kesse do 1î d' avri 1998).