L' anemeye å virûsse des poyons, c' est ene maladeye k' acsût les poyons d' poytreye dins les cwénze prumîs djoûs d' leu veye, cwand les poyes meres n' ont nén rescontré cisse maladeye la, ni esse eploctêyes disconte.

Cåzmint candjî

Li må est cåzé pa on virûsse del famile des circovirûsses (virûsses å SDN nén ravôtyîs).

Minêyolodjeye candjî

Si les poyetes ki vont divni mere ås poyons ont stî aclevêyes dins ene cinse aclevrece ahouwêye di tos les microbes (avou loumire et vintilaedje årtificiels), ele n' åront nén rescontré l' virûsse di leu djonnesse. Cwand ele pasnut dins les cinses di ponaedje, ele rascråwèt l' adjint malårdiveus å moumint k' ele vont ponre leus prumîs oûs. Zeles n' ont rén, mins les oûs sont acsûs do virûsse, et les poyons k' endè vont disclôre mostrer l' maladeye do 12inme å 17inme djoû d' leu veye.[1]

C' est possibe eto ki les poyons ki n' ont nou anticoir del mame soeyexhe epestiferés li prumire samwinne di leu veye. Après, les poyons sont edurants, apus k' i soeyénxhe eto acsûts pa ene ôte maladeye ki rabaxhe les disfinses do coir, come li boursite å virûsse.

Senes del maladeye candjî

Les poyons sont peneus, bladjots, et n' nén magnî. Les aiyes sont bleuses. L' ematocrite est dizo les 27 åcint (mormalmint dins les 40 åcint).

Å pus sovint, gn årè nou sene bén clair del maladeye, mins les poyons ni vont nén bén responde ås vaccinaedjes, aprume disconte li fåsse pesse des oujheas.[2]

Espaitchance candjî

Dins les poytreye di mames ås poyons ki les poyetes sont-st aclevêyes ahouwêyes did tot, on ls eploctêyrè divant k' ene ni ponénxhe (del 16inme al 20inme samwinne).

Cwand gn a nou vaccén dins l' payis, on pout amoenner di l' ansene d' ene rascråwêye cinse eviè les cinses des poyetes parintreces, po k' ele si vaccinexhe naturelmint.[3] Mins on riskêye eto d' elzî amoenner des ôtes maladeyes.

Sourdant candjî

  1. Live veterinaire Merck so les fis
  2. sorlon on conferincî del societé Lohmann.
  3. Live veterinaire Merck so les fis, come cial ådzeu