Årmilire coleur di låme

L' årmilire coleur di låme (on dit eto : tiesse di meduze), e sincieus latén Armillaria mellea, c' est on tchampion foirt corant, del famile des årmilires, ki vént todi a grossès taetches et k' a on pî sins volve mais avou èn anea.

Årmilire coleur du miel
Armillaria mellea (portrait saetchî pa Jean-Pol Grandmont)
Rindjmint sincieus
Ringne: Fungi (tchampions) Ecoxhmint: Basidiomycota Classe: Homobasidiomycetes Dizo-classe: Agaricromycetideae Ôre: Tricholomatales Famile: Tricholomataceae Djinre: Armillaria Espece: mellea

L' årmilire coleur di låme atake les raecinêye des åbes, et fé des defåts dins l' bwès.

L' årmilire coleur di låme est foirt rishonnante a l' årmilire d' Årdene, ki crexhe sol li schayisse.

Discrijhaedje

C' est on tchampion avou on tchapea (3 a 10 cm) di djaene coleur avou on boton pus foncé å mitan, des blankès lames serêyes ki purdèt li minme coleur ki l' tchapea e divnant pus viyes, on grand (8-20 x 1-2 cm) et pwintou pî, foirt elastike, fibreus et coriant.

Il a ene blanke et flotchteuse tchå, sins waire d' odeur et ene miete seur.

Biyonaxhes

I vént surtout so les stoks des vîs åbes ou les coxhes toumêyes al tere, di l' esté al fén di l' erî-såjhon disk' ås prumirès djalêyes. On l' rescontere purade sol castinne, el Walonreye, el Fåmene ey el Gåme.

Eployaedje

C' est on bon tchampion cwand il est codou tot djonne sins s' pî et bén cût.

Bibiografeye

Tites des lives e francès k' i gn a avou pus di racsegnes so ç' tchampion la:

• Régis Courtecuisse, Bernard Duhem: Guide des champignons de France et d'Europe (Delachaux & Niestlé, 1994-2000).
• Marcel Bon: Champignons de France et d'Europe occidentale (Flammarion, 2004)
• Dr Ewaldt Gerhardt: Guide Vigot des champignons (Vigot, 1999) - ISBN 2-7114-1413-2
• Roger Phillips: Les champignons (Solar, 1981) - ISBN 2-263-00640-0
• Thomas Laessoe, Anna Del Conte: L'Encylopédie des champignons (Bordas, 1996) - ISBN 2-04-027177-5
• Peter Jordan, Steven Wheeler: Larousse saveurs - Les champignons (Larousse, 1996) - ISBN 2-03-516003-0
• G. Becker, Dr L. Giacomoni, J Nicot, S. Pautot, G. Redeuihl, G. Branchu, D. Hartog, A. Herubel, H. Marxmuller, U. Millot et C. Schaeffner: Le guide des champignons (Reader's Digest, 1982) - ISBN 2-7098-0031-4
• Henri Romagnesi: Petit atlas des champignons (Bordas, 1970) - ISBN 2-04007940-8