Jean-Claude Van Cauwenberghe

Jean-Claude Van Cauwenberghe (pus coûtmint lomé Van Cau) a skepyî a Tchålerwè li 28 d' avri 1944.

(2004)

Van Cau veyou dins l' "Tao-tö-king" e-n imådjes

C' est on politikî walon, k' a stî mayeur di Tchålerwè, pu prezidint do Pårti Socialisse.

Di 2000 a 2006, il a stî prezidint del Walonreye. E 2004, il î aveut stî rlomé on deujhinme côp, normåldimint po diski 2009. Mins, e 2006, i s' a sintou oblidjî d' leyî s' plaece a Elio Di Rupo, di cåze do herleme des lodjmints sociås (Walonreye, 2006).

Di s' mestî, il esteut pårlî.

Kékès ôtès dnêyes

Mågré tot, e moes d' avri 2006, il atåvele Pårlumint walon, avou sacwants ôtes, on pordjet di mwaisse lwè pol Walonreye. L' idêye serè diswalpêye dins l' Pordjet Destate Bressene di rdiscotaeyaedje del Beldjike, bråmint espliké e 2007.

C' est onk des prumîs politikîs k' a djåzé e walon dins sacwants raploûs oficirs, et ki n' a måy catchî k' il esteut foirt binåjhe do ravicaedje do walon. Il a-st aprins l' walon el rowe, a Tchålerwè, cwand esteut roufion.

E 2004, i rçuva les wangneus do Pris do Coirneu a l' Elizete.

Cårire politike

• 1977-1983 : Pårlumintî
• 1983-1995 : Mayeur di Tchålerwè
• 1995-1999 : Minisse do Budjet, des Finances, di l' Eploye eyet del Fôrmåcion å govienmint walon eyet Minisse do Buddjet, des Finances eyet del Fonccion publike del Cominålté francesse
• 1999-2000 : Minisse do Budjet, di l' Ekipement et des Travôs publiks å govienmint walon
• 2000-2006 : Prezidint do govienmint walon.
• 2006-2007 : I dmeure simpe deputé å Pårlumint walon.

Lingaedje walon

Jean-Claude Van Cauwenberghe, c' est eto on walon-cåzant (pus speciålmint, do patwès di Tchålerwè). Il l' a-st aprindou cwand il a comincî a militer. Il aveut vlou k' les nos des rowes soeynuxhe dins les deus lingaedjes.