Dji vou vir Mioussev (e rûsse "Где вы, месье Миуссов?"), c' est ene pîce di teyåte, ene comedeye, sicrîte pa Valintin Katayev e 1947.

Sinne (pal dramatike di Gochliye)

Rascourti candjî

Li sinne si passe dins l' poice d' èn institut po si rpoizer des cotoûs d' Moscou, ki s' lome « Les Soleas » do tins do comunisse.

On fonccionaire d' ene creche, Zaytsef, doet fé siner on bon po del coleur, po rponde les léts d' efants orfulins. Si directeur, Mioussef, kel doet siner, s' a djustumint vnou rpoizer ås Soleas ci dimegne la. Mins Zaytsef n' a nén si cwåte di fonccionaire sor lu. Ça fwait k' on nel leye nén moussî.

Mins dizo ses ouys intere li feme Doutkine, ki si ome, c' est on grand professeur. Zaytsef tuze di s' fé passer po l' ome da Clava Igniatchouk, on no k' i trouve dins l' gazete. C' est ene djonne agronomresse ki vént d' wangnî ene medaye d' ôr di tractorisse e si academeye.

Et nosse Zaitsef adierceye si côp, tot payant les 55 roubes et 25 copeks pol djournêye di rpoize. Apus ki : vo n' la-t i nén ki l' vraiye Clara Igniatchouk a dné radjoû a s' galant ci dimegne la a l' Institut di rpoize « Les Soleas ». On bea mixhe-maxhe s' aprestêye…

Cotoû istorike candjî

Nos estans e l' URSS di 1947. Gn a yeu des moirts timpesse al guere di 40 et toplin des orfulins. Did la, li bastixhaedje d' orfulinats, come li ci ki va-z esse sitrimé deus troes djoûs après l' accion del pîce.

On n' pout nén critiker li redjime stalinisse k' est la al tiesse di l' estat. Les scrijheus d' teyåte ni polèt ki mostrer les biestreyes administratives, pal voye di comedeyes.

Li ci k' a ene rilomêye (li professeur Doudkine, on grand sincieus u Clava Ignatchouk, ene medaye d' ôr di l' academeye d' agricoûteure dins l' pîce) polèt aveur åjheymint des faveurs, come s' aler rpoizer dins on "spå", ou tot biesmint aveur on tiket d' cinema.[1]

Ratournaedjes e walon candjî

Dji vou vir Mignolet candjî

On redjårbaedje da Jacques Barry, djouwé a Gochliye les 20, 21, 27 eyet 28 di nôvimbe 2004. Droci, les nos et les fonccions des djins ont stî radaptés a ene comene di Walonreye, avou Modesse Mignolet, on scabén, ki dvént Mioussev.

Li måjhon di rpoize si lome « Les tchabårêyes.

Zaitsev, c' est Linåd Dupont, eployî al comene, i va payî 114 uros et 50 cenes pol djournêye ås « Tchabårêyes » Clava Igniatiouk divént Rôza Izadora, ene cinsresse ki vént d' wangnî li concours del meyeute aclevresse di pourceas Pîtrin d' l' anêye. Elle a rescontré si galant al fôre di Libråmont.[2]

Gn a des bokets do prumî ake sol tévé walon-cåzante (Youtube), dizo l' tite "Dji vou vir Mignolet".

Mins w' est i, l' Bouli ? candjî

Ratournaedje da Chantal Denis.

L' istwere si passe a Nameur. Li scabén, on lomé Bouli, a vnou passer sacwants djoûs po si rpoizer.

C' est Guy Brosteaux k' a metou l' pîce el sinne å Teyåte di Nameur, diviè 2005.

Dji vou vey Mioussef candjî

Tradûte a pårti do francès pa Willy Leroy, sins cnoxhance des ôtes modêyes e walon, ele fourit djouwêye pal dramatike di Veskeveye e 2016.

On wåde les persounaedjes del Rûsseye come dins l' mwaisse ouve. Dins l' foyou d' prezintaedje, on prezinte li cotoû istorike la ki l' pîce a stî scrîte.

Sourdants candjî

  1. Foyou d' prezintaedje del pîce a Veskeveye, måss 2016
  2. Plake lazer « Dji vous vîr Mignolet », Ceke « L' Avni », Gochliye.