Pûsmadje

Pûsmadje , c’est on ptit ban – frontîre del Walonrèye, rabané avou Vresse et k’è don passé dul Province du Lucsambourg al Province du Nameur.

• Stinduwe : 403 Ha., dont 286 Ha. du bwès.
• Altitude : 258 m. à l’èglijhe
• Eplaeçmint sol Daegn : 49°48’59 N – 4°54’00 E.
• Dimanants : 232 (1817) ;284 (1821) ;333 (1893)
• Sipotaedje : --
• Canton : Djedene
• Arondixhmint ; Dinant
• Province : Namur
• Payi : Beljike.
• Vîs scrijhas : Pussemaigne, Pussemagne (1617) Pucemagne, dins in vî pouyé rémois du 1306.
• Ecarts : La Tchafète. Bellevue et l’ Espèrance.
• Êwes : Pitit ruch ki vint d’ Suny , mousse à France et va à Mouse à Nouzon . C’est la Goutèle.
• Eglijhe : du 1873, à deus clotchîs.
• Patron : Sint Hilêre.
• Dicåce : Fiêsse du Sint : 14 djanvî.
• Sourdant : Tandel VI a, 1893.

Etimolodjie

• Puss, putz ont pou rcinéye : puteus, pwisse. Magne, maigne, mange vunat du magnus, cè ki dène : grand pwisse û parfond pwisse. La situwacion du viyaedje est bin ou fond d’ène gwâdje, å pîd des côsses, coume in grand pwisse.

An 1877, lu mwêsse du scole raconte ku 80 ans pus matin, les vîs djint co Pui-mange.

• La Tchafète, fame ki cåze brâmint, k’ è dné s’ nom al måjhon.
• La Tchafète, Bellevue et l’Espèrance sont, å mitan des bwès,des måjhons frontiére, ki fjint commerce d’ in payis à l’ ôte. Bellevue è duvnu ène proprièté pou les vacancîs.

Histwere

• Duvant la rèvolucion, prèvôté d’ Orcimont.
• An V, 3 vendémiaire, Comune du Suny canton du Neumani, dèpartumint des Ardennes.
• 1815, 6 djanvî, dustatchî du Méziéres et rumètu à Bouyon.
• 1823, rumètu al comune du Suny.
• 1859, 24 mêy, ruduvnu comune.
• 1965, rabané avu Suny. (Lux.)
• 1977, rabané avu Vresse (Nam.)

Ene viye cloche à l’èglijhe date du 1645. Ou mitan du XVI°s., Pûsmadje et Badjimont èstint des dépandances du l’èglijhe du Neufmanil. (F.) In vî tchestê årot egzisté à noune du viyaedje. Lu sègneur su loumot Régnier et avot ossi in tchèstê à Bohan. Pûsmadje, coume Badjimont, astint des fîs d’ Orcimont, mês les djins rutirint leus amwindjîs du France. Is payint pou ça, deus cartels d’avon.ne par djin. C’ ére lu drèt du « Såvmint û minuité » ; ç’ astot des viyaedjes ambedeus ( ki dèpandint de France et du Beljike.)

An 1786, gn è oyu à Pûsmadje, in duwel cèlèbe k’è oposé MM. De Saint-Mesme, èn oficir du réjimant de Ségur-Dragons et Barras, (lu frére du prèsidant du Directwâre.) Saint Mesme è sté tuwé rède. Barras prèsidant, n’ a savot co rin, cand il è dmandé à s’ frére, cè k’ il avot arivé à s’ soçon, Saint Mesme. - I n’ est ku blèssî, ruspond l’ ôte. - Eh bin, dju va v’ blessî ossi, dit l’ présidant et i lî casse ène djambe. Mês cand lu prèsidant è counu la vèrité, il è rmoussi al chambe du blèssî pou l’achèver. Mês çut-ci a-n è chapé, et ça è fini dins in tribunal d’oneur. Lu viyaedje du Pusmadje è ène èglijhe à deus clotchîs, båtie duzous Léyopold II. Deux clotchîs, pasku lu Rwa vlot dner dul Beljike, ène bèle imådje ås francès. Pusmadje è ossi ène bèle gare du tram, ou terminus dul ligne Palijhû – Bouyon. In tram francès î vnot ossi du Charleville. Les djins lu loumint : « L’ Torê », du soubriket des djins d’ Jespunsart (F.)