«WILL», ki s’ loméve Willy Maltaite, (Antêye, 30 d' octôbe 1927 - 18 di fevrî 2000), c' esteut on sinnarisse, dessineu et meteu e coleur di bindes d' imådjes.

Sipepieuse biyografeye candjî

Si popa di s’ mestî fjhéve tchåfaedjisse.

A ses 14 ans i saye d’ intrer e l’ Academeye di l’ abeye di Maredsous. On n’ î vout nén d’ lu.

Li dimègne i va aprinde li dessén a l’ U.P. d’ Dinant. Li pondeu-sculteu Daoust î est onk dès mwaisses.

Li sôrt a volou k’ Jijé (Joseph Gillain ki boute à Spirou) dimeure dins ces tins la dins l’ vijhnåjhe, a Bèthléem, et l’ bén voleur prinde come apurdisse po ene cope di samwinnes. C’ est l’ guere 1940-1945. Will fwait l’ voye tos les djoûs et insi trevåtchî bwès et paxhis dissu s’ velo. Jijé lyi aprind ene miete di tos les årts mins Will ni pout nén mete si mwins a ene b.d. I nel va poleur fé k’ eviè ses 20 ans.

Morris èt Franquin ont-st adon arivé po bouter avou Jijé ki dècide di baguer a Waterlô et d’ emoenner Will avou l’ pekêye. I vont viker tertos eshonne.

Li guere fineye, Jijé s’ è va ås Estats-Unis avou s’ feme et… Morris et Franquin. Vola k’ Will, dimoré tot seu et po wangnî ene miete di cwårs decide di fé ene b.d. k’ Dupuis n’ vout nén! Nén discoraedjî, Will s’ arindje avou s’ cozin Marcel Matagne k’ est imprimeu a Florene. C’ est don vaila k’ va s’ eplaidî et s’ bén vinde « Le Bambochal », e 1947.

Will passe sacwants moes a ovrer po l’ studio da Hergé (Tintin) et oblidjî d’ î dessiner come lu. C’ est pocwè i n’ dit nén non cwand Dupuis l’ houke et lyi dmander d’ riprinde li « Tif èt Tondu » da Dineur. El va continouwer des anêyes å lon et dessiner d’ après des istweres sicrîtes pa Dineur, Henri Gillain (fré da Jijé, ki dimoréve a Tamene!), Rosy, Maurice Tillieux et, po fini, Desberg.

E 1970, Will va fé rexhe « Isabelle » dissu des tecses da Macherot, Delporte et co bén Franquin. Will a eto sovint aspoyî ds ôtes dessineus come Peyo (Jacky et Célestin) et minme Franquin. On tins il a stî directeu årtistike po « RECORD », edité å Lombard.

Will, ki dessinéve voltî des belès coméres avou çki fåt ewou i l’ fåt — mins nén veyou d’ on boun ouy pa Dupuis — a tot d’ minme fini pa poleur si lèyî aler dins des albums come « Le jardin des Désirs » ou co « L’appel de l’enfer ».